Aksident i rëndë në bypass-in Fier-Vlorë, 8 të plagosur përfshi një foshnjë

Një aksident i rëndë rrugor ka ndodhur pasditen e sotme, rreth orës 15:00, në aksin Fier-Vlorë, konkretisht në segmentin e bypass-it. Shtatë automjete janë përplasur në një aksident zinxhir, duke shkaktuar panik dhe bllokim të përkohshëm të trafikut në zonë.

Policia njofton se në aksident janë përfshirë automjetet me drejtues shtetasit A. B., E. Gj., Sh. K., A. B., V. N., R. M. dhe M. V.

Si pasojë e përplasjes, tetë persona kanë pësuar dëmtime. Mes të lënduarve janë edhe dy pasagjere, M. Rr., 52 vjeçe dhe S. Rr., 32 vjeçe. Në spital janë dërguar për kontroll mjekësor edhe tre drejtuesit e mjeteve: R. M., 46 vjeç, M. V., 45 vjeç, V. N., 22 vjeçe, si dhe një foshnjë vetëm 1 vjeç.

Shërbimet e Policisë Rrugore mbërritën menjëherë në vendngjarje për të normalizuar trafikun dhe për të nisur hetimet lidhur me shkaqet e aksidentit. Grupi hetimor vijon punën për të dokumentuar dinamikën dhe përgjegjësinë e secilit drejtues automjeti.

Ngjarja rikthen në vëmendje nevojën për respektim të rregullave të qarkullimit dhe për rritjen e sigurisë në rrugët kombëtare, veçanërisht në segmentet me fluks të lartë automjetesh si bypass-i Fier-Vlorë.