Qori shpërthen kundër politikës: "Mjaft me taksa për të pasurit, ne zgjedhim demokracinë!"

Në një reagim të fortë në prag të zgjedhjeve parlamentare të vitit 2025, Arlind Qori, drejtuesi i “Lëvizjes Bashkë”, ka publikuar një pjesë të platformës së forcës që ai përfaqëson, duke denoncuar mënyrën si partitë e tjera po trajtojnë ekonominë dhe sistemin tatimor në vend.

“Partitë në garë janë futur në një garë premtimesh për uljen e taksave, por vetëm për oligarkët. Është një lojë e vjetër, e rrezikshme, dhe skajshmërisht e padrejtë”, u shpreh Qori në një video-mesazh. Sipas tij, “Lëvizja Bashkë” propozon një sistem të ri tatimor, që do të godasë interesat e grupeve të pasura dhe do të mbrojë ekonominë nga kapja nga bizneset e mëdha.

Ai shton se plani i kësaj force politike përfshin:

• Taksim të drejtë për korporatat dhe grupet e fuqishme financiare;

• Hetim të çdo lejeje ndërtimi në Tiranë dhe bregdet;

• Anulimin e ligjit për investitorët strategjikë;

• Rrëzimin e kullave të ndërtuara mbi shkelje ligjore;

• Ndalimin e ndërtimit brenda Unazës së Madhe;

• Krijimin e një agjencie të re për integritetin dhe luftën ndaj korrupsionit;

• Ligj të ri për financimin e partive, për t’i dhënë fund ndikimit të parasë në politikë.

“Nuk ka vend për oligarki në një sistem që pretendon të jetë demokratik. Zgjedhja jonë është e qartë: shoqëri e ndershme dhe e drejtë për të gjithë, jo për pakicën e pasur”, përfundoi Qori.