SPAK sekuestron 6 telefona të tjerë të Ilir Metës – Avokati: Janë thelbësorë për hetimin

Tiranë – Hetimet ndaj ish-presidentit Ilir Meta marrin një kthesë të re. SPAK ka sekuestruar gjashtë telefona të tjerë në pronësi të Metës, të cilët nuk ishin deklaruar më parë. Lajmi është konfirmuar nga avokati i tij, Leonard Karaj, i cili pranoi se kishte mësuar për ekzistencën e tyre vetëm sot.

“Sot e mësova që Ilir Metës i janë gjetur edhe 6 telefona. SPAK i ka marrë dhe i konsideron si shumë të rëndësishëm për vijimin e hetimit,” – deklaroi Karaj për mediat.

Sipas tij, sekuestrimi është kryer në përputhje me procedurat ligjore dhe me miratimin e

Gjykatës së Posaçme për Korrupsionin dhe Krimin e Organizuar (GJKKO).

Karaj shton se, ashtu si në rastet e mëparshme si ai i ish-ministrit Beqaj, edhe këtu SPAK ka marrë miratimin për të vazhduar me sekuestrimin dhe analizimin e materialeve që ndodhen në telefonat.

“Duhet pritur vendimi përfundimtar i gjykatës. Deri atëherë, çdo veprim është pjesë e një procesi hetimor që mund të ketë ndikim të madh në ecurinë e çështjes,” – përfundoi avokati.

Kjo lëvizje pritet të ndezë edhe më shumë debatet publike dhe politike rreth rolit të Metës në skandalet që po hetohen nga SPAK.