Tragjedi në Vushtrri: Pronari vret punonjësen dhe më pas veten, qyteti përfshihet nga pasiguria...

Qyteti i Vushtrrisë është tronditur sërish nga një tjetër ngjarje tragjike, ku dy persona kanë humbur jetën si pasojë e të shtënave me armë zjarri. Incidenti i rëndë ndodhi në ambientet e një biznesi lokal, ku paraprakisht dyshohet se pronari i lokalit ka qëlluar fillimisht punonjësen e tij, dhe më pas ka kryer vetëvrasje.

Identiteti i dy viktimave ende nuk është bërë publik, ndërsa Policia e Kosovës ka rrethuar vendngjarjen dhe po punon për zbardhjen e plotë të motiveve që çuan në këtë krim të rëndë.

Kjo ngjarje vjen vetëm një ditë pasi Vushtrria u trondit nga vrasja e një 19-vjeçari, Ardit Zymeri, i cili humbi jetën pasi u qëllua nga një i ri tjetër, Bleon Dibrani. Ky i fundit u arrestua menjëherë pas krimit dhe arma e përdorur u sekuestrua nga policia.

Në qytet janë shtuar ndjeshëm forcat e sigurisë për të parandaluar raste të tjera dhe për të rikthyer qetësinë tek qytetarët e shqetësuar nga ngjarjet e fundit.

Autoritetet lokale dhe policia kanë apeluar tek banorët për bashkëpunim dhe qetësi, duke u kërkuar qytetarëve të denoncojnë çdo rast të dyshimtë që mund të rrezikojë sigurinë publike. Hetimet për këto ngjarje vazhdojnë intensivisht, ndërsa pritet të zbardhen së shpejti detaje më të hollësishme.