Trump përjashton Rusinë dhe Korenë e Veriut nga tarifat tregtare të reja – Ukrainës i vendos 10%

Shtetet e Bashkuara kanë vendosur tarifa të reja tregtare që prekin shumicën e vendeve, por Presidenti Donald Trump ka përjashtuar nga lista Rusinë dhe Korenë e Veriut, duke i bërë ato dy vendet e vetme që nuk do të përballen me këto masa ekonomike.

Në një deklaratë për mediat, Shtëpia e Bardhë theksoi se sanksionet ekzistuese ndaj Moskës “tashmë përjashtojnë çdo tregti kuptimplotë”, ndaj nuk ka kuptim vendosja e tarifave të reja. Sekretarja e shtypit Karoline Leavitt për Axios sqaroi se kjo lëvizje nuk përbën zbutje të presionit ndaj Rusisë.

Ndërkohë, Presidenti Trump përmendi “bashkëpunimin pozitiv” mes Rusisë dhe Ukrainës, duke theksuar dëshirën e tij për të ndaluar luftën dhe për të arritur paqe. Kjo vjen në një moment kur Kirill Dmitriev, negociatori kryesor i Vladimir Putinit dhe një nga figurat kryesore të elitës ruse, zhvilloi takime zyrtare në Uashington. Ai është zyrtari më i lartë rus që viziton SHBA-në që nga fillimi i luftës në Ukrainë, në shkurt të vitit 2022.

Në kontrast me përjashtimin e Rusisë, Ukraina do të përballet me tarifa 10% për disa produkte, duke e shtuar presionin ekonomik në një moment tejet të ndjeshëm. Sekretari amerikan i Thesarit, Scott Bessent, deklaroi për Bloomberg se një delegacion ukrainas mund të vizitojë SHBA-në këtë ose javën tjetër për të diskutuar një marrëveshje të re për partneritetin ekonomik.

“Kemi përgatitur një dokument të plotë partneriteti ekonomik, që aktualisht është në shqyrtim nga ukrainasit. Synojmë të hyjmë në diskutime zyrtare dhe, nëse gjithçka ecën mirë, mund të kemi nënshkrime javën e ardhshme,” tha Bessent.

Lëvizja e administratës Trump po shihet me sy kritik në rrethet diplomatike dhe ekonomike, për shkak të mesazhit të dyfishtë që jep në lidhje me luftën Rusi-Ukrainë dhe qasjen ndaj partnerëve ndërkombëtarë.