Universiteti Bujqësor i Tiranës sjell ndryshime akademike për një treg pune më të përshtatur

Viti i ri akademik në Universitetin Bujqësor të Tiranës (UBT) fillon me ndryshime të rëndësishme, duke përfshirë riorganizimin e degëve dhe përmirësimin e kurrikulës. Sipas rektorit Fatbardh Sallaku, UBT do të implementojë një ofertë të re akademike, e cila fokusohet më shumë në praktikë dhe përafron modelin e Universitetit BOKU në Vjenë.

“Kemi një ofertë të re akademike, ku po përfundojmë mbylljen e tetë programeve Bachelor dhe hapjen e një programi të ri në teknologjinë bujqësore, bazuar në modelin e BOKU-s”, deklaroi Sallaku.

Ky bashkëpunim mes UBT dhe BOKU është mbështetur financiarisht nga qeveritë e Shqipërisë dhe Austrisë. Koordinatori i projektit, Hubert Hasenauer, theksoi se objektivi kryesor është përmirësimi i standardeve akademike të UBT-së për t’iu përshtatur tregut të punës dhe zhvillimit rural.

Ndryshimet synojnë të krijojnë programe ndërdisiplinore, duke i ofruar studentëve një kombinim të njohurive natyrore, teknike dhe ekonomike. Kjo reformë i përgatit ata për tregun e punës ose për studime të mëtejshme në nivel master.

Reformimi i universitetit bëhet për t’iu përgjigjur nevojave të tregut dhe për të ndihmuar zhvillimin e sektorit bujqësor në prag të integrimit në BE. Sipas Hasenauer, Shqipëria ka potencial të madh dhe është thelbësore që të diplomohen profesionistë të gatshëm për të kontribuar në zonat rurale dhe për të sjellë inovacion në bujqësi.

Studentët janë gjithashtu pjesë e kësaj reforme, duke dhënë sugjerimet dhe kërkesat e tyre për të ndërtuar një universitet më të përshtatur me pritshmëritë e tyre.