Zgjedhjet 2025: Diaspora shqiptare do të votojë me 250 mijë fletë votimi shtesë

Për herë të parë në historinë e zgjedhjeve parlamentare në Shqipëri, Komisioni Qendror i Zgjedhjeve ka miratuar prodhimin e fletëve të posaçme të votimit për shqiptarët në diasporë. Plot 250,724 fletë votimi shtesë do të përgatiten nga kompania sllovene Cetis, për zgjedhjet e 11 majit, në të cilat emigrantët shqiptarë nga 88 vende të botës do të mund të votojnë.

Formula për përcaktimin e numrit të fletëve të votimit është bazuar në shifrën e qytetarëve të regjistruar jashtë vendit, që aktualisht është 245,808 persona, plus një rezervë prej 2%.

Një zhvillim i rëndësishëm është edhe përzgjedhja e Parkut Olimpik "Feti Borova" në Tiranë si qendra kryesore ku do të kryhet menaxhimi i plotë i procesit zgjedhor të diasporës. Hapësira e këtij kompleksi sportiv do të shërbejë për tri procese të rëndësishme zgjedhore:

• Përgatitjen dhe administrimin e dokumentacionit zgjedhor.

• Ruajtjen e sigurt të votave që do të mbërrijnë nga diaspora.

• Numërimin dhe vlerësimin final të votave për 12 qarqet e vendit.

• 
  

Kryekomisioneri i KQZ-së, Ilirjan Celibashi, bëri të ditur gjithashtu se nga data 5 prill, do të fillojë procesi i përgatitjes dhe paketimit të zarfeve zgjedhore, të cilat do të shpërndahen në shtetet ku shqiptarët janë regjistruar për të votuar.

Përzgjedhja e Parkut Olimpik nuk është e rastësishme. Ky objekt plotëson të gjitha kriteret e Kodit Zgjedhor, përfshirë hapësirën e bollshme me kapacitet për rreth 1200 persona, furnizimin e garantuar të energjisë elektrike, hyrjen e lehtë për publikun, dhe kushtet optimale teknike për përdorimin e teknologjisë në numërimin elektronik të votave të diasporës.

Kjo risi shënon një hap të rëndësishëm në pjesëmarrjen e shqiptarëve jashtë atdheut në vendimmarrjen politike në Shqipëri, duke u mundësuar atyre për herë të parë një pjesëmarrje më direkte dhe aktive në zgjedhje.