Panik në Këln! 3 bomba amerikane të Luftës së Dytë Botërore zbulojnë një kërcënim të harruar – Evakuohen mbi 20 mijë banorë, qyteti paralizohet!

Një alarm masiv tronditi qytetin e Këlnit në Gjermani, pasi autoritetet zbuluan tre bomba të pashpërthyera të Luftës së Dytë Botërore në zemër të qytetit, duke detyruar evakuimin e më shumë se 20,000 banorëve dhe paralizuar jetën në qendër.

Ngjarja ndodhi të hënën dhe konsiderohet si “operacioni më i madh dhe më i rrezikshëm i këtij lloji që nga përfundimi i Luftës së Dytë Botërore,” sipas kryetarit të bashkisë së Këlnit. Tre bombat, të prodhimit amerikan, ishin të pajisura me detonatorë të ndjeshëm ndaj impaktit dhe kishin mbetur të fshehura nën tokë për afro tetë dekada, derisa u zbuluan gjatë një ndërhyrjeje ndërtimore.

Dy prej bombave kishin një peshë prej 1,000 kilogramësh secila, ndërsa e treta peshonte 500 kilogramë. Autoritetet e Dyseldorfit janë ngarkuar me çaktivizimin e tyre, një operacion delikat që po zhvillohet me përpikëri dhe në kushte të rrepta sigurie.

Evakuimi përfshiu një spital të tërë, dy azile pleqsh, një stacion treni, disa biznese, restorante, hotele, si dhe nëntë shkolla e kopshte. Ky paralajmërim i frikshëm nxjerr sërish në pah një realitet të errët për qytetet gjermane: edhe 80 vjet pas përfundimit të luftës, toka mbetet e mbushur me bomba që mund të shkaktojnë tragjedi në çdo moment.

Kjo nuk është hera e parë që ndodh diçka e tillë. Në vitin 2017, një bombë 1.4 tonëshe në Frankfurt detyroi evakuimin e 65,000 personave, ndërsa në dhjetor 2021, një tjetër bombë shpërtheu në Mynih, duke plagosur katër vetë dhe duke ndërprerë të gjithë trafikun hekurudhor në zonë.

Pyetja që ngrihet është e qartë: për sa kohë do të jetojnë qytetarët gjermanë mbi një tokë që fsheh pasojat e pashlyera të një lufte shkatërrimtare?