Shokuese në Librazhd! E lyeu me benzinë dhe i vuri flakën fqinjit për një konflikt banal – 75-vjeçari përfundon në spital, agresori në pranga!

Një akt barbar ka tronditur qytetin e Librazhdit, ku një 32-vjeçar tentoi të djegë të gjallë fqinjin e tij pas një konflikti të turpshëm për motive të ulëta. Ngjarja e rëndë ndodhi në ambientet e jashtme të banesës së viktimës, ndërsa autori është vënë në pranga nga policia menjëherë pas krimit.

Burime zyrtare bëjnë me dije se shtetasi S. O., 75 vjeç, u dërgua me urgjencë në spitalin e Prrenjasit me djegie të konsiderueshme, pas një sulmi të qëllimshëm me lëndë djegëse. Nga hetimet e kryera në kohë rekord, rezulton se autori i dyshuar, G. O., 32 vjeç, kishte shkuar te banesa e të moshuarit, ku në kulmin e një konflikti, e kishte lyer me benzinë dhe më pas i kishte vënë flakën, duke e lënë të përpëlitej nga dhimbjet.

Fatmirësisht, 75-vjeçari ndodhet nën kujdesin e mjekëve dhe është jashtë rrezikut për jetën, ndërkohë që agresori u kap në flagrancë dhe tashmë do të përballet me drejtësinë.

Ky akt i skajshëm dhune përbën një alarm për rritjen e agresivitetit të pashembullt në komunitet dhe shpërfaq nevojën për reagim të fortë institucional dhe shoqëror.

Materialet janë referuar Prokurorisë pranë Gjykatës së Juridiksionit të Përgjithshëm Elbasan për veprime të mëtejshme.